កាលពីពាក់កណ្តាល ឆ្នាំ២០១៤ ទាំងពិភពអ្នកជំនួញ និងអ្នកសិល្បៈបានសម្តែងភាពភ្ញាក់ផ្អើលពេញផ្ទៃប្រទេសម្តងរួចមកហើយរឿងលោក គិត ម៉េង និងអ្នកនាង ស្រីតូច ចំណាន ដែលមានឈ្មោះពិត ម៉ៅ សុចំណាន បានសម្រេចចិត្តដឹកដៃគ្នាចូលរោងការនៅចុង ឆ្នាំ២០១៤ ឬដើម ឆ្នាំ២០១៥ ក្រោយចំណងស្នេហ៍លាក់មុខរបស់អ្នកទាំងពីរបង្កើតបានកូនប្រុសស្រីរហូតដល់ទៅ ៤នាក់។ ប៉ុន្តែដំណឹងដ៏ខ្ចរខ្ចាយបែរជាស្ងប់រលត់ទៅវិញ ខណៈពេលវេលាចេះតែរំកិលផុតទៅ តែអាពាហ៍ពិពាហ៍ដ៏អស្ចារ្យពុំមានលេចរូបរាង។
ដំណឹងធ្លាយចេញជាថ្មីទាក់ទិននឹងសេដ្ឋីល្បីឈ្មោះដឹកដៃតារាស្រីកំណើតពី ខេត្តស្វាយរៀង ចូលរោងការនៅថ្ងៃ ទី២០ ខែមីនា ត្រូវបានប្រភពមួយទម្លាយឲ្យដឹងថា នឹងប្រារព្ធនៅសណ្ឋាគារកាំបូឌីយ៉ាណា ជាមួយនឹងតម្លៃជួលក្រុមហ៊ុនពិធីការរៀបចំរហូតដល់ ១០ ម៉ឺនដុល្លារឯណោះ។
តាមការបញ្ជាក់យ៉ាងខ្លីពីសាច់ញាតិកូនកំលោះ ក៏បានរំលេចនូវចម្លើយថា «yes» ប្រាប់មក ភ្នំពេញ ប៉ុស្តិ៍ ផងដែរ តបនឹងសំណួរអំពីកាលបរិច្ឆេទចូលរោងការរបស់លោក គិត ម៉េង និងអ្នកនាង ស្រីតូច ចំណាន។
ទោះជាយ៉ាងណាក្ដី ប្រភពពីសាច់ញាតិដដែលនោះមិនបានបរិយាយក្បោះក្បាយទេក្រៅពីប្រាប់ថា៖ «នោះជារឿងឯកជន»។
ទន្ទឹមនឹងនោះ ប្រភពពីបុគ្គលិកបម្រើការនៅទូរទស្សន៍ស៊ីអិនស៊ី ដែលសុំមិនបញ្ចេញឈ្មោះក៏បានលើកឡើងដែរថា មង្គលការលោក គិត ម៉េង នឹងប្រព្រឹត្តទៅនៅ ខែមីនា នេះមែន។
អ្វីដែលបង្កការភ្ញាក់ផ្អើល និងធ្វើឲ្យមហាជនចង់ឃើញពីពិធីអាពាហ៍ពិពាហ៍លំដាប់សេដ្ឋីនេះលេចរូបរាងឡើងគឺកាលពីប៉ុន្មានខែមុនក៏មានដំណឹងល្បីថា មង្គលការនេះនឹងចំណាយប្រាក់ដល់ទៅ ១ លានដុល្លារ។
កូនក្រមុំនារីជនបទមានប្រវត្តិហូបក្តាមខ្យងនៅទឹកដី ស្រុកស្វាយជ្រំ មានយីអ៊ុនអណ្តែតក្លាយជាហង្សទេព នឹងត្រូវបានកូនកំលោះទ្រព្យស្ដុកកុម៉្មង់រថយន្តដ៏ទំនើបតម្លៃ ៥០ ម៉ឺនដុល្លារពីចក្រភពអង់គ្លេស ជាមួយនឹងរ៉ូបកូនក្រមុំរចនាម៉ូដពីបរទេសតម្លៃ ១ សែនដុល្លារ។ សូម្បីតែម្ហូបមួយតុល្បីថាថ្លៃ ១ ពាន់ដុល្លារ។ ទន្ទឹមនឹងនោះ ក៏ល្បីថា មង្គលការនេះបានចំណាយដល់ ១ សែនដុល្លារឲ្យអតីតពិធីការិនីល្បីឈ្មោះនៅទូរទស្សន៍ជាតិលោកស្រី សាន់ ណារ៉ាឡងឌី សម្រាប់ចាត់ចែងពិធីការ និងផ្នួងផងដែរ។
ប៉ុន្តែនៅពេល ភ្នំពេញ ប៉ុស្ដិ៍ ទាក់ទងសួរ អ្នកដែលល្បីថាធ្វើពិធីរៀបចំមង្គលការលោក គិត ម៉េង នោះ លោកស្រី សាន់ ណារ៉ាឡងឌី បានធ្វើការបដិសេធយ៉ាងខ្លីថា៖ «មិនមានទេ។ សម្អាងការខ្ញុំ មិនមានអ្នកឧកញ៉ា គិត ម៉េង ជួលទេ ហើយក៏គ្មានសម្អាងការណាគេជួលក្នុងតម្លៃថ្លៃ ១០ ម៉ឺនដុល្លារបែបនេះដែរ»។
ដូចគ្នានឹងសម្ដីបដិសេធរបស់អតីតពិធីការិនីដ៏ល្បីល្បាញខាងលើ អ្នករៀបចំកម្មវិធីនៅសណ្ឋាគារ កាំបូឌីយ៉ាណា ឈ្មោះ នែលី បានអះអាងថា មិនបានទទួលបានដំណឹង លោក គិត ម៉េង នឹងរៀបចំពិធីមង្គលការនៅសណ្ឋាគារនោះដូចគេនិយាយឡើយ។
អ្នករៀបចំកម្មវិធីនៅសណ្ឋាគាររូបនោះបានបញ្ជាក់ថា៖ «មកទល់ពេលនេះ មិនទាន់បានដំណឹងថា ថ្ងៃទី២០ ខែមីនា សណ្ឋាគារទទួលរៀបចំពិធីរៀបការធំបែបនោះទេ»៕
Post a Comment