រាជធានីភ្នំពេញ ៖ កាលពីវេលាម៉ោង១២ និង២៥នាទីថ្ងៃត្រង់ ថ្ងៃទី ៣ មីនា ២០១៥ នៅចំណុចផ្លូវលេខ៥១៦ កែង២៨៩ សង្កាត់បឹងកក់១ ចោរឆក់២នាក់ត្រូវប្រជាពលរដ្ឋចាប់បានវាយរហូតទ្រមខ្លួន ដោយបានធ្វើសកម្មភាពឆក់កាបូបយួរពីស្ត្រីម្នាក់មិនបានសម្រេច។
ជនសង្ស័យទាំង២នាក់ ម្នាក់ឈ្មោះហាវ វាសនា ភេទប្រុស អាយុ២១ឆ្នាំ ស្នាក់នៅផ្ទះជួលក្នុងសង្កាត់ស្ទឹងមានជ័យ និងម្នាក់ទៀតឈ្មោះថាន ឌន អាយុ១៦ឆ្នាំ ស្នាក់នៅសង្កាត់បឹងកក់១ ខណ្ឌទួលគោក ចំណែកជនរងគ្រោះឈ្មោះវង្ស សុខុម ភេទស្រី អាយុ៦០ឆ្នាំ មុខរបរជាចុងភៅ ស្នាក់នៅព្រះវិហារយេស៊ូក្នុងសង្កាត់ទឹកថ្លា ខណ្ឌសែនសុខ។
សាក្សីនៅជុំវិញកន្លែងកើតហេតុបានឲ្យដឹងថា មុនពេលកើតហេតុស្ត្រីរងគ្រោះបានជិះម៉ូតូឌុបគ្នា២នាក់ធ្វើដំណើរមកពីជ្រោយចង្វារតាមផ្លូវលេខ៥១៦ ខណៈមកដល់ចំណុចស្តុបភោជនីយដ្ឋានរតនៈស្រីម៉ៅ ស្រាប់តែមានជនសង្ស័យ២នាក់ជិះម៉ូតូធុនC125 ពាក់ស្លាកលេខភ្នំពេញ១BC៦២៣៨មកអែបជិតរួចធ្វើសកម្មភាពឆក់កាបួបយូរពីស្ត្រីរងគ្រោះ ហើយក៏ប្រវាយប្រតប់គ្នាបណ្ដាលឱ្យជនសង្ស័យដួលម៉ូតូ។
ខណៈនោះស្ត្រីរងគ្រោះបានស្រែកឆោឡោផ្អើលដល់ប្រជាពលរដ្ឋនៅក្បែរនោះចេញមកជួយអន្តរាគមន៍ស្វាគមន៍ម្នាក់មួយដៃមួយជើងរហូតទ្រមខ្លួនទើបប្រគល់ឱ្យប៉ូលិសប៉ុស្តិ៍បឹងកក់១ចាត់ការតាមច្បាប់ ចំណែកកាបូបត្រូវបានដកហូតប្រគល់ឱ្យម្ចាស់វិញ ដែលក្នុងកាបូបនោះមានលុយចំនួន៥០០ដុល្លារ៕
Post a Comment